CY政府陷入困境，誤判為欠缺輿論宣傳，所以要組織班子打民意戰，並加大宣傳攻勢。我之認為此乃誤判走入歪路，因為此舉會進一步孤立政府。
歐美政黨輪替執政，有一套清晰政治倫理及文化，領袖政治立場公開，傳媒社論親邊個政黨一目了然，執政黨宣傳由黨部負責，而政府執政內閣政治工作則由幕僚、顧問等政治人員執行，分工一清二楚。
組閣冇理念 騎呢人上位
港人治港失敗，根本原因係冇去發展一套執政體制，除一個小圈子選出特首外，究竟按乜嘢準則去組成司局長內閣、行政會議、議會內多數黨領袖，如何連結成一個執政機器，實現政府意志。假如冇此藍圖，單靠加大宣傳、鼓動民意、分派政治酬庸，對提高執政能力，冇乜太大幫助。
黨派執政首重意識形態，政黨閣員要有共同核心執政理念，也要擁有相近政治歷練。新加坡內閣部長，有地方選區服務及選舉經驗，成為國會議員後再加入政策委員會，表現好則經政黨評審再晉身部長，有規有矩，斷唔會好似香港咁騎呢，可以無厘頭爆出無人認識的名字，如環境局「星爺」、教育局「吳得掂」，或中策組何燕飛、高靜芝、關永圻諸如此類。至於CY核心執政理念係乜？相信佢班內閣冇乜人講得出。
司局長有一定政治能力、政治動員能量及政策論述能力，使鬼一班蛋散顧問去幫倒忙。吳局長講話口震、眼神閃爍，對政策把握不足、欠基本同公眾溝通能力，佢根本唔應該做問責官員。「謬波」局長一出場，記者與公眾已反感，仲學人講「爭奪話語權」？至於特首本人處理醜聞拖泥帶水，反口覆舌，公眾信心盡失，連累政府，試問再拍多幾條API，日日在CCTVB黃金時間播，再加多幾個網絡五毛打手在Baby Kingdom挺梁又如何？有效果嗎？至於利用公職委任搵到一大班政治蠱惑仔在傳媒起哄幫拖，日日花錢在《信報》、《明報》登萬言書挺梁，在公眾眼中有公信力嗎？
ATV反發牌騎呢宣傳show，雖然搵到有些少民望嘅文化人胡恩威站台，但有冇多咗普羅市民及輿論支持王征，大家有眼睇。CY政府唔肯正本清源，處理核心執政能力低落問題，靠中策組搞騎呢政治，此乃行之歪路，搞到自己友建制派都保持距離，仲衰過以前。
添馬男