【本報訊】鄉議局處理僭建物的小組下月初與發展局開會，爭取新界屋宇僭建物合法化關注大聯盟昨日動員數百村民衝擊鄉議局大樓，把矛頭直指鄉議局主席劉皇發，批評劉處理僭建問題態度軟弱，斥責劉是「人渣、縮頭烏龜」，要他下台。「新界王」劉皇發接過請願信後於會議上反駁，「如果唔係我，你哋（村民）真係冇飯食呀」。
記者：呂浩然
約有400名村民昨日下午集結在鄉議局大樓內大聲呼叫口號，有村民更加舉起「爭取慣性添建物合法化」的標語。
何君堯帶隊 村民激動
聯盟發言人何君堯表示，向當局登記僭建物「無出路」，因最終只會令僭建物被取締，故要求鄉議局代為反映，村民聞言後情緒亢奮，更有人大叫「佢（政府）拆嘅話，我哋拆佢骨」。其後村民將矛頭指向劉皇發，不斷要求劉現身接信，有村民更高舉「無能主席，累鄉民乞食」的標語，大喊「人渣出嚟」、「劉皇發出嚟，見吓我哋啲鄉民，唔好做縮頭烏龜」。雖然鄉議局副主席張學明保證會百分百如實反映村民意見，卻未能平息村民怒火。
劉皇發：驚都未驚過
村民集會期間，突然有人提議衝擊鄉議局會議室，數百村民即一擁而上，衝上會議室門外試圖硬闖，但被工作人員攔阻，雙方推撞數分鐘後，村民成功入場，部份人更當面指摘劉皇發，但劉表示「驚都未驚過」，劉接過請願信後，村民和平散去。其後劉皇發在鄉議局執委會會議上按捺不住，提醒村民要深入了解僭建問題，越說越動氣地指，「唔好以為擾攘吓我就被人睇小，你估我醜你唔醜咩？」「有能力衝出去吖，喺門口鬧劉皇發有咩用呢？搵對象（鬧）要搵啱對象，我無做錯怕咩呀？好人當賊辦！」「如果唔係我你真係冇飯食，成二萬蚊差餉……基本法第四十條都係我寫落去㗎」。會後他希望村民冷靜，對於村民是否遭人鼓動，劉說：「有可能，咩都有可能」。
何君堯堅稱對事不對人，強調社會對村屋僭建問題應作適當調整，「並唔係話僭建係咩咁大嘅事」。劉皇發表示村民不申報僭建，後果自負。
