翠華茶餐廳（1314）招完股，新股市場嘅焦點開始轉投大大隻、集資超過300億嘅人保集團（1339）身上，不過近期新股市場唔算旺，人保出唔出到仲係未知數。聽講人保為求順利上市，新近要求參與嘅十幾間投行簽冇價錢嘅包銷文件，不過大部份外資行睬佢都儍。
招股價欠奉 點簽文件？
近期新股市場淡靜，有新股會要求投行做hard underwriting，即係要預先承諾包銷幾多，人保今次連招股價都未諗掂，就要求投行簽包銷文件，孭咁大風險，外資投行梗係唔制。
不過家投行生意難做，集資1至2億美金嘅新股，都有兩、三間投行做保薦人，基本上冇乜肉食，難怪投行不停俾啲客有咁盡鍊咁盡。
另一邊廂，臨近年尾，基金經理唔願意隨便落飛認購新股，萬一新股掛牌後潛水，拉低投資組合表現咪弊，所以買賣兩邊都難應付！