吳亞軍離婚，龍湖（960）唔見33億！華華一早講過「夫妻檔」應該喺招股書列為風險因素之一，繼雅天妮（789）同米蘭站（1150）後，噚日龍湖主席吳亞軍都爆出離婚，仲分咗三成股權畀前夫蔡奎，龍湖即插4%，市值單日蒸發接近33億，散戶無啦啦要幫手為呢筆「疑似贍養費」埋單，認真唔抵！
吳光正阿二變阿三
聯交所資料顯示，吳亞軍同蔡奎本來一齊揸住七成半龍湖，但8月初開始變成女方揸四成半，男方揸三成，事件曝光後，龍湖公關承認兩人已離婚，市場驚蔡奎掟貨搞到龍湖債務違約，一於早沽早着，龍湖收市報13.7元，跌4.2%，現市值743.6億元。
兩位呢次鬼祟分身家，除散戶無辜損手，無端由第二大股東變第三大股東嘅九倉（004）主席吳光正，手上5.04%股份，市值亦縮水1.56億。