中資公司來講，中電信（728）算係最鍾意做宣傳嘅公司之一，佢哋聽日（22號）又趁感恩節抽水做宣傳，連續第二年請飲靚女咖啡。
中電信舊年第一次喺感恩節，請飲名模Amanda S.喺中環國金間餅店嘅咖啡，有五、六十人為見靚女一面，竟然晨早8點未夠，就喺餅店門外排隊，老闆娘亦企足一日打點做生招牌。
換一杯咖啡 捐一包米
中電信聽日會請飲2000杯啡，想飲靚女咖啡嘅，要剪低報紙coupon再去排隊，暫時唔知老闆娘會唔會現身，但中電信承諾，市民每換一杯咖啡，中電信將捐一包兩公斤白米畀食物銀行，即係一共捐出4000公斤白米。
佢哋話一包兩公斤白米平均夠一個家庭食一個禮拜，唔使錢嘆靚咖啡，仲可以做埋善事，條宣傳橋幾好。