「萬人迷」碧咸宣佈下季離開洛杉磯銀河！咁佢去邊呀？據報，多間澳職球會都話有興趣，希望將碧咸爭到手；碧咸自己喺聲明都話，佢想搵職業生涯嘅最後挑戰，而佢已經征服咗歐洲同美洲，所以下站去大洋洲都正路！
正當洛杉磯銀河高唱猛進，再度殺入美職季後賽總決賽之際，37歲嘅碧咸突然喺周一宣佈下年離隊，嚟緊香港時間12月２號對侯斯頓戴拿模嘅總決賽，會係佢喺銀河嘅最後一戰。碧咸解釋：「喺銀河，我度過咗一段難以置信咁特別嘅日子，但我想喺掛靴前尋找最後嘅挑戰。」
4隊爭崩頭 雄心成大熱
邊度係碧咸嘅最後挑戰？多支澳職隊即刻舉手認投！據澳洲足總表示，至少4間球會有興趣，其中一間仲已經發咗邀請㖭！睇報道，墨爾本雄心最積極，佢哋嘅CEO史葛蒙恩話：「我哋已提出邀請，碧咸絕對有機會嚟。」有指雄心欲以200萬澳元（約1,600萬港元）請碧咸嚟踢10周。中岸水手都唔執輸，佢哋發言人話：「我哋肯定會爭埋一份，佢嚟到一定可以令球場爆滿，改變呢度嘅足球。」更有指水手計劃向碧咸提供一間8房海景別墅，以吸引他來投。珀斯光輝亦透過官方twitter宣戰：「美職季後賽總決賽將會係碧咸喺銀河嘅最後一戰，意味住一場競爭開始了。」
除了澳職，有傳碧咸會到中超或者中東掘金，但佢始終係有家室嘅男人，消息人士表示：「大衛（碧咸）作呢個決定時，會考慮兩樣嘢，一係對事業嘅期望，二係對屋企人嘅影響。」中國同中東都符合佢尋求挑戰嘅要求，但澳洲生活文化同美國接近，相信屋企人較易適應；再考慮老婆維多莉亞鍾意大城市呢一點，難怪英國博彩公司會將雄心列為碧咸下一站嘅頂頭大熱（見附表）。
回顧番碧咸喺銀河嘅6年歲月，最光輝嘅一刻肯定係上年幫球隊勇奪總冠軍。今季，銀河再闖總決賽，力求衞冕；如果碧咸可以領球隊實現兩連霸，相信肯定會係佢喺銀河嘅最好結局。
