近年的「亞洲足球先生」有啲似「亞洲先生」，一樣騎呢古怪。這項選舉自94年開始舉辦，轉捩點在2005年。當年規定缺席頒獎禮者，被取消資格，卻沒考慮日期在11月尾，正值旅歐的亞洲球員的季中搏殺期；結果朴智星、中田英壽、中村俊輔等全部未獲球會放人而「落選」。候選名單餘下的最後3人中，連身處亞洲的大熱門艾查巴都「放飛機」，令最終得番兩人爭，名不見經傳的沙地後衞艾蒙達沙利忽然黃袍加身；由選最佳變成「選尾2」，得啖笑。
往後亞洲足協更直接了當，只選在亞洲搵食的球員；此舉原意希望增強亞足協屬會和球員的曝光率和認受性，可惜適得其反。明明大量亞洲球員已在歐洲頂級球隊坐正，你卻去選個甚麼奧尼洛夫斯基、傑柏羅夫為亞洲足球先生；老實說，真不知有多少球迷識得上述兩位人兄，結果傳媒懶得報道，球迷懶得理會，嘥氣。
今年亞足協再創新猷，新設「亞洲國際足球先生」，特別為於亞洲以外搵食的球員而設。首屆3位候選人為曼聯的香川真司、國米後衞長友佑都及富咸鋼門舒華沙。其實當世界風氣是全球化，不論身處何地，只要是真正強的亞洲球員便可參選，這項新政似是進步之舉。
然而，細看當選細則，原來亦有「候選者必須出席頒獎禮才可獲獎」。頒獎禮下周四於吉隆坡舉行，即係養緊傷嘅香川最有機「大熱當選」。原來此遊戲仍非選最佳，是選最「黑」－－邊個傷?無工開，攞獎啦！
方柏翹