「股神」畢菲特嘅一舉一動吸引市場注意，最近股神大手減持強生，令人揣測佢係咪睇淡美國消費市場。股神腦袋諗緊乜，大家都想知，佢過去50年做大刁嘅辦公室又係點㗎呢？原來簡單到不得了，枱頭連電腦都冇部。
冇電腦 用算盤
股神今年初接受美國哥倫比亞廣播公司（CBS）採訪，帶觀眾參觀佢位於美國小鎮奧馬哈嘅辦公室。股神一向以慳家見稱，雖貴為全球排名第三位富豪，但個辦公室同粵語殘片場景有得揮，張書枱有成75年歷史，係股神爸（Howard Buffett）留低，好有紀念價值，牆上仲有神爸後生時嘅靚仔相。
股神辦公室亦貫徹佢唔好高科技嘅個性，莫講話iPhone，就連一部電腦都冇，最高科技嗰樣已經係枱頭部電話。佢仲好抵死咁話：「我間房係冇電腦，家仲係用緊算盤，如果應付到嘅話，下一步就會背乘數表！」佢講完都大笑。
另外要講牆上掛住嘅一張證書。原來畢菲特後生嗰陣好怕公開演說，於是喺21歲嘅時候，就花100蚊美金讀咗個改善講嘢技巧嘅課程，不過讀完後就變咗講唔停口！仲向當時女友Susan求婚成功，所以呢個課程真係抵到爛。
李華華
mailto:[email protected]