「人人為我，我為人人！」這句粵語長片對白，彰顯上一代人崇尚無私情操；然而今天的香港物慾橫流，奉行「專門利人，毫不利己」的雷鋒精神只會被笑傻仔。
生於工會家庭的社區組織協會幹事吳衛東，父母瞓身為工人謀福祉，背後被人暗笑傻仔。阿東原是中大經濟系畢業尖子，卻棄走平坦的金融大道，選行無發達的社工路，專幫窮人出頭，還說社會需要更多傻人，且聽他如何解說。記者：吳淑義
「我今年45歲，22年前喺中大經濟系畢業，畢業前一年遇上八九民運，提醒自己要搵有興趣嘅工，雖然已經有銀行請我，但我想做社工，家做到係好幸運同感恩。
父母搞工會被笑係儍
細個跟父母去工會，知道政府聽唔到工人嘅聲音，加上我睇嘅書叫《工人血淚史》，講緊以前工友無論受工傷或者受不平等對待，社會都唔係好理會，佢哋需要有人代為發聲。聽過有工友笑我父母係傻嘅，平時要返工仲搞工會，花時間喺賺錢嘅地方仲好啦。我走上父母條路，覺得自己係幸福而傻，呢個世界需要一啲傻人去堅持理想，先有機會有少少轉變。
我大仔九歲，細女七歲，太太原本係社工，為專心照顧仔女而冇做。我平時一個禮拜最少開夜三晚，工作需要會搞到四、五晚，星期六日人哋家庭樂，我就去請願示威，有緊急情況就即刻出去，一切靠太太頂住，對家庭有啲虧欠，但都會做落去。
搞足球隊助重建信心
從1999年起做露宿者服務，佢哋全部都有我手機號碼，因為好多露宿者九七前月入過萬，但家媖好似唐英年所講，喺有生之年都好難翻身，佢哋需要有個電話確切搵到你，如果打去辦公室搵唔到人，會以為社工耍佢，好快放棄求助或者諗自殺。
露宿者都係人，政府唔可以做侵權行為，今年2月15號，食環署同警方喺深水埗南昌街將40幾個露宿者嘅家當掉晒，家政府要向每個人賠2,000蚊。總結單官司，係政府冷血同麻木不仁，當時天氣咁凍，露宿者擺明冇得反抗，到打官司又要拖咁耐，有兩個等唔到就過咗身。
但整體已經贏咗，因為公眾同法官都知道理喺露宿者呢邊，政府唔可以知法犯法。
露宿者最緊要係重建信心，05年我搞由露宿者組成嘅『曙光足球隊』，第一個接觸係前甲組足球隊成員阿昌，佢開頭唔認自己係露宿者，有段時間好掙扎，由前甲組球員到無家者足球隊成員，身份落差令佢好抗拒，當然最後都接受咗，仲得到身邊嘅人同前甲組球員鼓勵，佢喺足球隊裏面再建立自己。阿昌家已經做咗小老闆，同屋企人關係改善咗，而且仲結咗婚生埋仔。
我哋球隊開頭冇乜資助，到家有50幾個團體合作，嚟緊會同和富合辦無家者世界盃，希望將正面訊息宣揚開去。」
窮人最懷念董建華
香港回歸後貧富懸殊不斷擴大，樂施會最新報告指本港有117萬窮人，而在職貧窮人口達65萬人。在吳衛東的社工生涯裏，親歷三位特首對窮人的態度，他說：「我認識嘅窮人，佢哋都會懷念（前特首）董建華，因為董生政綱係有理念，佢會講老有所為、老有所依、老有所養，曾經提過未有綜援嘅老人點算呢？又講香港有100萬窮人，但提完之後就腳痛落台。」
斥曾蔭權不食人間煙火
阿東狠批前特首曾蔭權不識民情：「佢絕對係不食人間煙火，唔知窮人有幾窮，扶貧委員會係佢一手解散，所有幫到窮人嘅政策，不單止冇改善，仲差咗。」至於新上場的梁振英，阿東疑中留情：「我對CY當然有期望，佢再成立扶貧委員會，而特惠生果金方向係令冇拎綜援嘅人改善生活，而我希望佢進一步推老人退休金，或者要有討論。」