雖然樓價屢創新高，但成交慘淡，靠佣金糊口嘅地產代理，競爭激烈程度可想而知。最近有代理為咗爭客，不惜喺大街大巷表演真功夫，迷魂鎖穿心腿全部出齊，高登更有二次創作，加上街頭霸王計時背景，幾可亂真。
樓市交投薄弱，最大原因當然係特膠政府推出嘅額外印花稅（SSD），打壓炒風不成，更令樓價大升，冇殼蝸牛慘被玩死。SSD剛滿兩周年，龍頭地產股跌7%至19%，代理美聯集團（1200）則狂瀉53%，認真慘情。
睇番美聯上半年盤數，收益減少2.4%，但回贈及租金支出分別大增45%及20%，全靠壓低員工成本，令盈利只跌37%，至1.3億銀。政府剛公佈推出加強版SSD及BSD，樓市成交肯定雪上加霜；之不過咁，經過一輪洗倉後，美聯現價年度化市盈率已跌至10倍樓下，假設末期唔派息，齋計中期息都有4.1厘，對股價有支持作用，只要有丁點好消息，隨時會大反彈，一於小注買入博大茶飯。
唐牛