咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
曼聯嘅反勝魔法今輪失效，輸咗畀諾域治0:1，令好多等睇紅魔反敗為勝嘅球迷失望。今場曼聯反勝唔到全因領隊費格遜，係佢唔記得咗反勝魔法最重要嘅咒語！
冇活力點反勝
反勝嘅魔法棒其實一直都喺費Sir手上，但佢今場好似唔記得咗唸咒語咁，換人後嘅曼聯仲係一潭死水，最後輸波。咒語係咩？就係增強活力！落後下，費Sir先換入韋碧克同史高斯，其實都正路，但最弊係留番傑斯喺度。兩老齊齊落場有咩後果，相信大家仲記得輸畀熱刺嗰場，上半場兩老正選，結果中場癱瘓，熱刺先入兩球，換邊後即刻換走傑斯，先至追到輸2:3完場。今場嘅情況差唔多，喺史高斯入嚟而路爾斯華倫西亞換走後，本來冇咩活力嘅中場更加冇活力，唔使輸多球都係因為諾域治全心死守。
睇番曼聯今季兩場落後兩球下反勝3:2的比賽，費Sir嘅換人都係加強活力。歐聯對布拉加一場，佢用衝擊力強嘅拿尼入替香川真司，到贏到3:2後，先搵傑斯入嚟拖慢番節奏，保住勝果；聯賽對維拉一場，佢先後用查維亞靴南迪斯同湯卡華利換走艾舒利楊格同年紀較大的史高斯，進攻效率即刻提高，又打下一場經典嘅反勝戰役。
曼聯今季反勝嘅方法就係全場壓逼，加快進攻節奏，令到對手跟唔上而犯錯，費Sir嘅工作就係幫球隊喺關鍵時間注入活力，保持或者加強呢種打法，但佢今場落後下竟減低活力，試問曼聯又點可以施展反勝嘅魔法呢？文：咖喱