近年龍獅旗重現香江，搞到北大人好緊張，政府中人梗係唔想孭鑊，林鄭月娥早前就出信「提醒」公務員，唔好再將印有效忠英女皇嘅港英年代信封誤寄畀市民。近期仲有網民就大鬧水務署抹走港英遺物，刻意篡改歷史，喺兩個地方嘅紀念碑「捽走」龍獅徽章，但原來事件只係一場誤會。
龍獅徽章惹民怨
有讀者向八方報料，話發現政府疑似有進一步「去港英化」嘅行動，皆因有網民發現萬宜水庫以及船灣淡水湖，呢兩個地方嘅供水計劃紀念碑上面嗰個龍獅徽章；前者好似俾人鑿走咗，後者就好似俾人捽甩晒啲色，唔少網民質疑水務署篡改歷史，諷刺水務署點解唔一不做、二不休，索性將石碑上麥理浩個名，改埋做狼振英咪仲全面！
水務署竟然咁「膽大包天」？八方梗係打去問吓點解要派員做手腳咁鬼蠱惑。點知署方大呻「冤枉」。佢哋解釋，萬宜水庫石碑上嘅龍獅徽章位置，本身係凹咗落去，再喺上面上色，經年累月之後，徽章嘅顏色自動甩晒，剩低個凹位，遠睇咪似俾人鑿走咗；至於船灣淡水湖，都係風化侵蝕先會甩色咋，唔係佢哋搞事呀！
據聞呢個抹走龍獅徽章嘅疑雲，令水務署噚日收到唔少投訴電話：水務署話喎，轄下有唔少呢類石碑，署方一早聯絡咗古物古蹟辦事處，研究復修嘅可行性同技術要求。睇怕喺咁群情洶湧嘅時候，水務署要研究點可樣加快呢個技術性研究咯。
mailto:[email protected]