新一屆立法會開鑼，唔單止新面孔嘅議員多咗，就連議員助理都換咗唔少新人。過去時有出現議員漏報或錯報開支同利益，搞到議員一身蟻。立法會秘書處例牌喺新會期開始之初，開「雞精班」教吓班議員以及佢哋嘅助理，點樣填寫申報先冇問題。
八方聽聞，今屆嘅「雞精班」反應麻麻，好多議員冇親身出席，只派助理代上堂，但據聞連助理都只係小貓三、四隻，而且上堂時反應冷淡，聽完一大輪都冇人提問，唔通係識晒咁巴閉？
其實立法會開鑼至今，已經出現唔少因為唔熟程序而出現嘅「蝦碌」場面，議員與其花唇舌為出錯解話，倒不如畀少少時間聽書可能仲好喎。