咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
之前追過日劇、台劇，近期就對強國劇集幾有好感，特別剛剛收工返到屋企，咁上下時間就播《美人心計》，除咗有胡杏兒、陳鍵鋒、林文龍等港星客串，由頭孭飛到尾嘅林心如，真係細細嗰睇到大。近期劇情就講到林心如個囝囝順利登基，就係漢朝有名嘅景帝，林退居皇太后都仲指指點點，搞到同景帝不和。咁啱強國又搞完十八大，胡總完全裸退，竟然獲中外傳媒讚好，原來「不在其位，不謀其政」，喺中國係一件值得歌功頌德嘅好事。
賓帥憑咩邀功？
講開「不在其位」，前利物浦領隊賓尼迪斯游手好閒一段時間，又走出嚟撈，講想教番英超球隊；睇見紅軍呢排青訓產品成功，又走出嚟認叻，話好開心利物浦宜家仲延續緊佢注重青訓嘅理念，無錯史達寧、蘇索、韋斯頓，都喺賓帥在任期內簽入，佢都有啲伯樂功勞，但一個球員真正能夠上位，並唔係咁簡單。
小弟已不止一次盛讚史達寧，未夠18歲已顯示佢嘅聰明頭腦；上周六主場對韋根嘅第1個入球，史達寧就夠膽深入對手腹地，先施施然搵身處最有利位置嘅蘇亞雷斯。當然人無完美，佢埋門嘅把握力始終有待改善，好似第3球窄位射唔入，要靠荷西安歷基幫手執雞。另外，史達寧始終身材輸蝕，個人突破後好易畀對手追得番，好彩佢仲細，可做吓gym加強對抗性，前途仍然光明。
當然英超近年都不乏「小時了了」嘅例子，史杜列治、史葛冼佳亞等一去大會甚至無冇埋影，我認同賓帥唯一一點，就係紅軍至少較有耐性培養年輕球員。文：牽牛