相隔五年，美國再度舉辦一級方程式大賽，今次選址在奧斯汀搞，斜坡、直路同急彎組合，起步勁飆上坡便遇上急彎，相當刁鑽刺激，充滿德州牛仔狂野Style。加上紅牛隊Vettel同Webber嘅精采演出，現場急速升溫！
記者、攝影：徐影龍
引擎聲轟到耳痛
07年因車胎爭拗事件，導致美國分站取消，靜咗幾年，今年終於由前NASCAR車手Tavo Hellmund，拉攏德州奧斯汀富豪舉辦賽事，雖然之前傳言工程延誤問題，有機會趕不及今年賽事，而現場睇，又真係好多地方未鋪好石屎路，觀眾都係由外圍踩住爛地進入，好彩場內設備已經搞掂晒，超過11萬觀眾都可坐定定安心睇飆車。筆者首度踏足德州，亦係首次入場睇F1，數以萬計的觀眾在齊聲吶喊，氣氛極High！排位賽時四五架車鬥時間，引擎聲好碎料，點知到翌日正式比賽，十幾架F1齊齊在起點發力狂飆，身處其中簡直似有20隻金剛加30隻暴龍圍住你打交，引擎聲轟到我以為自己聾咗！不過場內必須規行矩步，就算係傳媒兼VIP身份，筆者活動範圍都相當狹窄，莫講話無機會埋Vettel身拎簽名，就算走位搵拍攝角度也是極之有限。
Vettel未能提前奪冠
佔地超過700英畝，賽道更由德國著名設計師Hermann Tilke包辦，全長約5.5公里，最具特色首推起點大直路狂轟後，盡頭便是約30゜上坡道，緊接着U形急彎，車手上到坡頂先望到彎心，掌握Brake Point甚有難度。至於冠軍人馬紅牛車隊表現不俗，尤其少年車神Vettel在排位戰中，做出1'35.657單圈最佳紀錄。本來預計Vettel拎硬車手冠軍，點知隊友Webber死車退出，Vettel缺乏隊友支援；法拉利Massa又以換波箱「策略」推後排位，間接令隊友Alonso排位提前一名；再加上排第二嘅麥拿侖Hamilton死咬唔放，在中後段終於守唔住被Hamilton超前，最後Vettel屈居亞軍，而Alonso就第三，令到年度冠軍車手名銜，要留待下一站巴西決勝負了。雖然Vettel未能提前奪冠，不過積分仍然領先Alonso 13分，點都有優勢。
車迷有Say
