亞視今年以來可以話鬧劇連連，最令人諗唔通，係堂堂全球第一間華語電視台，公然「鑑粗嚟」擺鍾庭耀上枱，老屈亞視與無綫收視「四六開」，敢問一句，ATV你搞邊科？
亞視積弱多年，不過正正因為一向弱，「基數低」，冇負擔，所以敢創新。好似《今日睇真D》、《百萬富翁》以至近期嘅《亞洲星光大道》反應極佳，無綫都要出手抄。亞視劇集雖然極少，但想當年套《我和殭屍有個約會》，確令菲菲怒追，試問以流水作業方式製作劇集嘅無綫，又點敢重本炮製咁天馬行空嘅殭屍片？
「二奶台」偶有佳作，雖然值得留戀，但俱往矣！亞視目前明知違反守則，都全力洗腦阻發牌，不思進取也。諗深一層，難道政府唔發牌，就會喺你度落廣告？唔好玩啦。學菲菲朋友話齋，ATV鬧劇更加證明發牌嘅重要，「唔好阻住我睇王維基呀」。
Fifi
本欄逢周二、四刊出