歐聯來到第5輪，要必勝求出線嘅強隊普遍開盤偏熱；寧熱捧英甲快車期，連獲主場之利嘅普雷斯頓，氣走諾士郡。冷敲車仔頂住祖記，看清誰是真強隊。
巴塞上次北伐天寒地凍嘅蘇格蘭，1.17倍客W遭些路迪迎頭痛擊；今次作客莫斯科背負地上最強之名，莊家亦唔會手軟，畀多少少有1.2倍，個人不沾手。話題賽事，莊家膽敢開出祖記讓上屆冠軍車仔半／一；路人甲都知祖記務必要贏保出線夢，但究竟喺國內聯賽水準日薄西山下打滾，嚟到生死關頭能否撼低真強隊、上仗聯賽收起眾巴西兵輸波嘅車仔？個人抱極大懷疑，今場冷博和局。
另一場防熱倒，係要必勝嘅賓菲加，迎戰些路迪得1.33倍；些路迪今季專攻歐聯，表現值得尊重，葡超又有幾叻，大家心照，加上賓菲加年年賣走球星，國內只識單打獨鬥波圖，小心被些路迪穩守突擊收死。重點攻略，撐英甲普雷斯頓贏諾士郡。兩隊上周末命運各異，普軍完場前被作客賓福特逼和；諾士郡苦戰兩度落後下追和主場嘅斯肯索普。從得失球看兩軍性能相若，但隔3天再戰，再佔主場之利嘅普雷斯頓少讓平／半，撐上盤比任何一場今輪開嘅歐聯讓球盤安心。(下次見報日期：24 /11)