思捷（330）過去呢幾個月發生嘅所有事，就好似一套緊湊兼一環扣一環嘅連續劇。6月起，由主席同CEO連環辭職揭開序幕，再到柯清輝接手做主席，跟住中南、海通等broker開始密吸股份。唔夠兩個月，思捷就話請到新CEO，上任無耐即決定供股。
去到上個禮拜高潮位，爆出前大股東邢李㷧持有逾10%股份，股價爆升。有芬佬朋友話，如果有人想說服佢呢一連串騎呢離奇事件，只係純屬巧合，佢會覺得係侮辱緊佢智慧。
邢氏出山呢個被視為「正面」嘅消息，咁橋喺供股權結束買賣後披露，應該有唔少原本唔想供嘅投資者，一早就沽咗個rights，返唔到轉頭。大家要知道，思捷同一般供股嘅公司唔同，思捷無大股東，包銷要由投行滙豐同瑞銀搞掂。
兩間精甩邊嘅投行，會否為咗區區2.5%佣金，去包銷一隻反應好大機會唔得、分分鐘幾十億貨要「上身」嘅deal？會唔會係有人事先已講明會接貨呢？思捷供股嘅最後限期已過，結果會喺呢幾日公佈。家先係戲肉。
海迪