國泰航空（293）用55億起嘅新貨運站暫定明年1月啟用，近月四出挖角，由於機場島好缺人，所以單係承包搬運工作嘅兩間公司，至少高薪請咗200位搬運哥哥，聽講平均月薪萬四蚊，有五至六年經驗嘅甚至有萬八至兩萬蚊。
最近聽空運界人士狂呻，話俾國泰貨運站高薪搶人，又越來越少後生仔願意長途跋涉入機場返工，尤其係藍領工種，特別難請人。咁又係，政府實施最低工資後，後生仔寧願想舒服服做保安，逗萬幾蚊人工做茶餐廳侍應又得，使乜山長水遠去機場搬貨喎。
家機場幾個空運同速遞貨站嘅搬運工人，一般月薪好似話有萬二蚊，有幾年經驗或有幾個人跟住搵食嘅，人工會高啲。
新貨運站要請1200人搬貨
國泰貨運站今年中將搬運工作外判畀兩間貨運公司，由佢哋搵人做搬運。為應付明年初首階段開業營運，兩間貨運公司迫住要高薪挖角，家至少請咗200人。貨運站會分階段陸續啟用，到明年下半年要有1200名搬運工人，先可應付到全線運作，可以預期搶人情況唔會停。
查實港機工程（044）上個月因為唔夠熟手同半熟手技工，接唔到生意而要發盈警，已經令人嘖嘖稱奇。整飛機要專業技工，人手訓練不足都仲可以理解，家連搬運工人都唔夠，話晒機場同空運係香港經濟命脈之一，如果因為唔夠人，搞到服務水準下降，咁就唔係咁好啦，CY政府使唔使留意吓呢？
李華華
mailto:[email protected]