想換個角度講吓思捷環球（330），諗吓點解佢仲未剔出藍籌？不論以市值、業績、管理層混亂程度，以及股價走勢，根本晨早應該消失。有評論指當局想保持零售股於恒指比重，但周大福（1929）、高鑫（6808）及Prada（1913），隻隻千億市值、流通量高，均是可考慮之選，思捷有得留低，令人摸不着頭腦。
又有說藍籌今次加到50隻，下次應會踢走思捷。邊個話爆額先可以踢走股份？能者居之，思捷由高位跌足八成，業績不值一提，生產流程問題多多，被ZARA、H&M遠遠拋離，短期如何翻身？
魏力大膽講句，思捷至今未Out，人事關係相信佔好大原因，能夠勞駕柯大俠做過渡主席，「硬食」媒體冷嘲熱諷，又叫得郁邢先生出山撐價，呢位「大佬」絕不簡單。
早前介紹過的中視金橋（623），昨日在淡市下一棍爆上9%，收報3.69元。內地媒體報道，明年央視廣告進行招標，入標金額達158億人仔，相當誇張。金橋擁有央視多條新聞及體育頻道的獨家廣告代理權，上半年營業額得7億銀，增長潛力龐大，加上獨市生意，盈利啖啖肉。在絕佳優勢下，歷史PE得7倍，息率近6厘，實在係大偏低！坐四望五，相信指日可待。
魏力
http://www.facebook.com/2012jason