免費電視牌照到底發定唔發，已經成為政治課題，魔童王維基釜底抽薪，佢間城市電訊（1137）賣晒電訊資產，家陣除咗向香港寬頻提供節目內容同些少投資收入外，堪稱「有出冇入」，聽日城電公佈截至今年8月底嘅全年業績，如果唔見紅就奇。
但魔童唔打算因為業績差而潛水，反而乘機高調現身，繼續爭取政府發牌，講明聽日會講免費電視同多媒體業務發展嘅展望。可以肯定嘅係，魔童唔會好似亞視高層咁，吹雞叫旗下藝人跳騎呢舞撐場。
咁又係，魔童向來言論出位，單打獨鬥絕對難唔到佢，唔使搵人跳舞都有收視。城電公關仲唔覺意透露，大家如果想睇城電藝人，12月初舉行嘅節目巡禮就有得睇。照咁講，就算政府遲遲唔發牌，王維基嘅攻勢依然浪接浪。