現代教育(1082)主席Ken Sir(吳錦倫)向來投資物業有道,今年初沽凱旋門大宅門單位勁賺7100萬,之後掃入牛池灣峻弦同大埔天賦海灣兩件貨,成個樓市大好友咁,點知佢最近轉咗view,話怕咗政府,要減磅套現。
聞股價潛水即封嘴
Ken Sir噚日難得現身主持股東會,即刻問佢買唔買樓,點知佢話沽緊貨,「政府政策係好重要,個人係鬥佢唔過。」唔通Ken Sir曲線撐CY嘅房屋政策有料到?
雖然個人投資轉向,但公司投資又唔係咁講喎。皆因現代教育今年7月攞3680萬買入旺角信和同旺角中心幾個單位,Ken Sir撐呢單刁,話入貨後美國推QE3,物業賬面價值升唔少,股東應該滿意。之但係,公司股價自舊年上市以來潛水76%,咁點先?Ken Sir就話:No comment!