新、舊財爺曾俊華、梁錦松噚日齊齊現身澳洲會計師公會高峯會，無官一身輕嘅梁錦松明顯風騷好多，上至經濟，下至太太伏明霞投訴超市貨品越來越貴，乜都講一餐，反觀鬍鬚曾大部份時間板着臉，讀稿五分鐘後嗱嗱臨鬆人，睇見佢咁趕，不禁問一句：做官係咪真係咁好呢？
一粒鐘似talk show
離開熱廚房9年、家係黑石大中華主席嘅梁錦松好似開talk show咁，個speech講咗成粒鐘，難得在場人士冇釣魚，皆因內容豐富，太太嫌超市貨品貴嘅家事、幫小母牛喺內地做義工嘅善事、內地換新班子有利私人投資嘅國事，全部講一餐。講完落台仲要同朋友傾多陣，心情好到不得了。
反觀鬍鬚曾就好似心事重重咁樣，上台讀稿五分鐘後，好快閃咗，冇捧梁錦松場。唔知係咪因為地產建設商會呢個星期，會就買家印花稅（BSD）提意見，佢諗緊點樣拆招呢？