《南華早報》被揶揄「紅早」，不無原因。八方聽聞，紅早每月都會頒發二千蚊現金獎畀表現良好嘅員工，以起鼓勵作用，例如最佳故事、最佳美藝同最佳標題等等，但本月嘅最佳評論得獎作，就惹嚟好多員工不滿。
話說Alex Lo早前寫過一篇評論文章，批評反國教學生針對政府官員，而且只識一味反對、唔識妥協等。
據聞呢篇評論文章見報後，報社內部已經有唔少爭議，點知呢篇曲線撐國教、挺政府嘅「紅文」，竟然攞埋獎，即時辣㷫唔少員工，質疑公司係咪覺得呢啲意見啱聽先？
八方仲聽講，Alex Lo嘅「文采」得到左派賞識，有人仲想幫佢出書㖭呀。