睇過「德國股神」科斯托蘭尼著作的戰友，應記得他將股市與經濟基本面，比喻成小狗與主人的關係—主人帶小狗散步，有時小狗會跑在主人前面，有時則會落後，小狗就是股市，而主人就是經濟。
炒股票亦如是，許多時候分析一輪認定是好股，買入後股價卻不動如山，望着其他股炒到飛天，心裡不是味兒。繼續死守，還是換馬？魏力一般會選擇以注碼應對，操作大概是：買第一注，只買想投入此股的三分之一，再觀察其走勢，如對辦才加注。勿因一時頭腦發熱，一買就賭身家，贏面自然大打折扣。
本欄8月曾推介中生製藥（1177），指其突破3蚊阻力後，有力扶搖直上創新高，但之後幾個月都是在2.80至3.10元區間上落，實在令人不耐煩。如開頭買得太多，如何能坐到幾個月？但如首注只買少少，就有能力守，到上周五公佈第三季業績後，股價終如小狗般狂奔，一棍就升13%，收3.51元，短線目標4蚊應冇走雞。
另一愛股莎莎國際（178）公佈半年業績後連爆兩日，衝過上6蚊，走勢好靚。上半年純利增長26%，連特別息派7仙，在租金爆升壓力下，管理層交到呢盤數，難能可貴，但預測PE達20倍，溢價高咗啲，不妨候5.50元附近再買。
魏力