和食×白酒
白酒變味日本清酒
朗豪酒店Wine Guy Zach Yu，可以話今次訪問中令小記最驚喜之人，對酒類的熟識度以至配搭，簡直有如人肉字典級數，而且質感、味道與結合理論，都係出自佢手筆，最重要是為人健談，大家得閒不妨上去搵佢問酒！
今次佢嘅重點推介，係一支奧地利白酒！味道清淡柔和，質感又有啲清酒風格，據知好多高級日本料理店都用佢！味道是集合了三大名種提子之大成，首先佢係一支強烈香氣型白酒，有點Sauvignon Blanc的影子；至於口感則有點似Riesling，有種柔和的礦物感覺；尾後感則似Pinot Gris，令你輕輕聯想到白胡椒的味道。
用呢支酒配刺身，當遇上日本芥辣、薑或葱茸，會有種放大強烈香氣的效果；不過更得意係當佢遇上天婦羅時，佢會將炸漿內嘅米香放大，令佢散發出有如純米大吟釀嘅青瓜香氣，是清酒還是白酒，到這刻你會好難分辨！
清爽醇和 易夾卷物
簡單嘅軟殼蟹卷物，不過能做到料多而飯薄，令口感更上一層樓！配酒是傳統風味的蘇格蘭威士忌，味道清爽；由於原木桶之前浸過些梨酒，令果香味特重，還有點啤梨、蜜糖、肉桂味道，基本對加洲卷或任何牛油果配搭到的和食，都可以配合得好好。
烈酒變味道放大鏡
最愛西京醬燒嗰種味噌氣息，同微微焦口感，不過呢度做得最過人之處，係醬燒後仍能保留銀鱈魚的風味；配酒是美國威士忌，屬較重身的Median Body兼重油性，所以同菜式的質感非常夾；至於飲下時，還會有點呍呢拿及原木香氣，此亦同麪豉非常匹配，加上酒精嘅烈性，會將菜式所有味道如放大鏡般提升！
Tokoro（3552 3330）
旺角上海街555號朗豪酒店三樓
中國菜×葡萄酒
果香去蟹粉腥臊
鶴湖蟹影係帝苑東來順的首本名菜，並曾獲香港旅遊發展局頒發「2006美食之最大賞」至高榮譽金獎！以薄荷甜酒做啫喱湖底，芋頭、鍋巴作蟹籠，頂上蟹粉則加入本地龍蝦仔肉，再配以薑、葱、鎮江醋及蟹黃油，令蟹味更豐富及霸道，連伴碟的小蟹都是薑汁凍，絕對是切想周到。配酒屬果香形（雜啤梨味）的葡萄酒，可有助減輕蟹粉腥臊之味，而且口感勁Smooth，同一般蝦蟹及海鮮類伴食，可謂襯到絕！
東來順（2733 2020）
尖沙嘴東部麼地道69號帝苑酒店B2層
襯靚果皮 尾後感要長
大斑起肉切片，固然食得方便舒服，配以$1,500一両的10年老陳皮、果皮香味更是濃得化不開！此白酒有一種非常成熟的水果香味，同陳皮的甘香成熟果味可謂絕配；由於陳皮味道有種較長延續性的特徵，所以酒的尾後感都要做到稍長，先至配得佢起！
黑松露多寡 影響酒輕重
本地五、六両細細隻的花龍，肉質已經好爽嫩鮮美，再以炒桂花翅的方法，快炒、嫩炒，更凸顯此菜風味，上菜時餸面灑上少量法國黑松露，更令整道菜變得貴氣兼香氣四溢！
一般人心目中，黑松露香味較重，所以多會選用香氣型較重的酒作配合；但此道菜中，黑松露的角色，只是作少量的點綴，原意係唔想蓋過龍蝦的鮮味，所以選酒時，酒飲只需微帶點果香、少少礦物感，同有較長的尾後感，就可以同黑松露達成平衡的效果。
帝苑軒（2724 2666）
尖沙嘴東部麼地道69號帝苑酒店B2層
星洲菜×葡萄酒
汁醬甜 酒要跟住甜
皇家太平洋酒店嘅沙嗲軒，同新加坡旅發局合作，舉辦了「躍動味覺之旅」，並邀得當地名廚蘇明杜來港作菜；當中不得不提佢個沙嗲串燒，將菠蘿加入沙嗲中，係六、七十年代星加坡的舊式做法，而且還有減辣、去油膩同開胃的作用；配酒特別揀選了用Riesling提子的白酒，甜度達8.4%，有如桃及杏脯Stone fruit核果味道，兩者風味完全相配。
淡色紅酒唔嚡口
六吋虎蝦做成的亞參蝦，味道略帶酸甜，配菜洋角豆，以大葱、蝦米、椒蒜、胡椒粒炒香，大增東南亞香辣風味。配酒是以Pinot Noir所做的紅酒，由於提子皮較薄、酒色較淡，單寧亦會相對較低，令「沙紙」口感大減，好能夠配合亞洲菜式的細緻感。
沙嗲軒（2738 2368）
尖沙嘴廣東道33號中港城平台一座三號店（$398套餐/加一服務費）
中國菜×香檳
香檳氣泡清潔味蕾
南非罐頭鮑魚，配上花膠、蹄筋、花菇、瑤柱脯及髮菜等貴價海味，當中海參可是一斤兩隻的重手貨，特厚肉、勁好口感，足四人份都只係$950，酒店價勁抵玩！
配酒建議係法國香檳，除咗因為味道夠複雜，好匹配之外，遇到呢類膠質較重的食物，香檳的細密氣泡，會有清潔味蕾的作用，幫你預備食下一道菜，其他酒飲未必做到相同效果。
Median Body啱清新小炒
一磅20-30頭的澳洲巨型鮮帶子，以「浸熟」的手法增加其軟滑口感；西蘭花小心炒至八成熟，再加薑酒辟去草青味，整道菜予人一種毫不油膩的清爽口感，絕非一般酒家所能冀及！配酒是出名Dry、有礦物感及Median Body的Chablis，剛剛同菜式的清新細緻配合得宜；但如果海鮮味道太複雜，醬料過多，就未必襯到呢支酒。
桃李（2313 4225）
尖沙嘴東部麼地道72號日航酒店二樓