今日係無綫45周年台慶，亦係前揸弗人邵逸夫（六叔）嘅新曆105歲生日，已經近13個月冇公開露面嘅六叔，唔知會唔會出席今晚台慶呢？而擔任司儀嘅汪明荃（阿姐）、鄭裕玲、崔建邦同陳百祥等，噚日喺將軍澳電視廣播城拜神同綵排。阿姐買好戰衣今晚靚靚現身，講到下月頒獎禮，對主演嘅《巴不得媽媽》有冇期望？阿姐老實話：「我諗都係留番畀後生，我冇睇其他劇集，但聽聞徐子珊同楊怡都幾好。」
視帝大熱黎耀祥同黃浩然及關菊英就綵排打鼓，個個都好落力，尤其企喺中間嘅祥仔話唔衰得，所以好大壓力。其他演員噚日都忙於綵排，繼黃長興同朱晨麗綵排台慶受傷之後，噚日輪到陳國峰練單槓落地時扭傷右腳腳踭，要電視城嘅救護員即場包紮抬走。
陳豪冇求婚
另外會參加台慶嘅陳豪噚日喺紅磡出席活動，講到同女友陳茵媺去巴黎旅行畀人影相放上網，同埋因拒絕合照俾人話冷漠，陳豪話：「自己想保持低調，知道同人影完合照會俾人放上網，自己都唔好意思。」佢亦否認有趁旅行求婚。
撰文：馮仁昭