香港官場精英查實都係眷戀殖民地天天講英文嘅美好時光。人稱「D姐」嘅公務員事務局前局長俞宗怡早前喺會展舉行餞別宴，宴請多位前任同現任高官出席，有份出席嘅新民黨葉劉淑儀話所有人上台講嘢，都係用英文，秉承政務官高英文水平嘅優秀傳統。
D姐喺官場聲譽極佳，人緣甚佳，所以餞別宴都有好多高官出席，筵開19圍，出席嘅幾乎都係官場精英。葉劉仲公開咗集結由殖民地開始上位嘅政務官精英合照，包括政務司長林鄭月娥、前工務司詹伯樂、前憲制事務司施祖祥，仲有多個局嘅常秘好似栢志高、黃鴻超、黃灝玄、楊立門。嗱，呢班就真係「港英餘孽」喇！
葉劉喺facebook話，D姐能幹、處事認真，為人一絲不苟，對佢甚為欣賞，兩人曾經係親密戰友，仲係香港大學校友，因為曾同屬工商科，一齊升職做副工商司同工業署署長。不過，兩人離任命運各異，一個滿是祝福掌聲中榮休，一個就曾經喺噓聲中下台。