阿仔Chester對《周末醒Son》〈痛心疾首〉有意見：「時代唔同啦，以前興日頭打工，夜晚就讀夜校增值自己，因為自己無錢；家父母都畀得起比讀大學更貴嘅學費啦，結果大家學歷通貨膨脹，搞到唔想讀嘅都走去讀。不過如果將副學士IVE等等學生一概打為係懶得出來做嘢又有啲以偏概全，的而且確呢啲學位令一啲讀書成績唔好，但又對某學科有興趣既人提供一條出路；又有人係因為公開考試失手先入唔到大學。通常我見呢啲同學都入得番大學。」
以下是我的補充：
阿仔我想你講我知其中究竟有幾多個認同讀書的價值及／又知道目的何在？為搵工應該去讀職業先修，為保證有工做應該投身建造業，可知扎鐵一工幾多錢？辛苦？不如你又話過我知有甚麼工作唔辛苦？點辛苦，都辛苦不過hea讀hea做。還記得我有寫過讀者來函問我何解明明日日hea做，照道理那麼他條輕鬆印印腳應該是筍工，日子過得很容易才對，為甚麼如此難過，做得咁辛苦？"When there is a will, there is a way"，真正有興趣就自然會找到辦法。
偶然失手有幾個？
但事實上，絕大多數都是用讀書作為逃避的藉口，花五、六萬一年學費讀完都不知道讀過又可以做得乜，像你所講的偶然失手的有得幾多個？若果家中有米負擔得起，確實無話好說。明知經濟條件吃緊父母日捱夜捱還要撲錢交學費，我不能接受！有位好爸爸日做夜做捱到心臟病發猝死，就是為了供女兒讀會計副學士。想做會計師其實最簡單，只要肯用功一級級考牌考上去就可以，公餘進修絕對得，我完全看不到她讀這個副學士的價值何在。你亦身為人子，你說呢阿仔？
張慧敏
http://www.facebook.com/HKcareerdoctor