一年一度嘅樂施毅行者噚日結束，上市公司當中，精電（710）行政總裁蔡東豪（Tony）同康宏理財（1019）主席王利民最積極參與，兩人今年各自組隊參加，鬥快完成賽事，結果由王利民一隊以18個鐘55分勝出，快Tony隊大約三個半鐘。
賭注係餐飯
聽講兩隊八人意猶未盡，計劃明年1月中參加「香港100」再鬥過，「香港100」同毅行者一樣行100公里，好似話有三分二路程同毅行者一樣，但要喺32粒鐘內完成，短過毅行者嘅48個鐘，而且屬於個人賽，要單打獨鬥，行到半路行唔郁，唔會有隊友幫手，玩法完全唔同。
Tony同王利民依然分兩隊，八人各自參賽，賽後將各人完成時間加埋，最短一隊勝出。查實贏輸事小，佢哋都係志在增加比賽成份令大家玩得落力啲，輸都係輸餐飯，兩位一定輸得起喇。