蘋機會：紙板變喇叭　10分鐘輕鬆上膊

經典造型的收音機，咪以為黑人先Yo得起！拎上手總重量竟不足1kg，摸落去仲夠滑溜又輕飄飄！睇真啲，其實它是德國潮牌Berlin親手炮製的紙皮HiFi喇叭Boombox，靚唔靚聲屬其次，最緊要連身材嬌小的本地Hip Hop少女，一樣可托上膊隨街Yo，插埋iPhone 5播歌，你型晒啦！

記者：陳國輝　攝影：陳盛臣　模特兒：[email protected]

由零開始　砌出喇叭

僅以音樂角度欣賞Berlin Boombox，你絕對會感到失望！佢唔同傳統喇叭，既無減震及降嘈的音箱，更不懂結合高、中、低頻幾類單元，簡單嚟講，只不過係一堆瓦通紙！但最過癮的地方，係你必須由零開始砌起，「材料」包括一塊3mm厚厚硬皮紙、一對迷你單元及一塊小型電路板。
可能你嫌佢不如一部跑馬仔收音機，但喜歡享受DIY過程的你與我，能親自製作一部HiFi喇叭，淨係呢份滿足感都爆晒燈！現場示範由摺盒、駁線以至可成功播歌，所花的時間都不用10分鐘！更難得由於佢用料輕，加上只用三粒AA電池即可推動，令總重量唔夠1kg，就算唔係孭上膊玩Hip Hop，也可摺埋收入背囊，去老友屋企開Party或BBQ，一樣咁輕鬆。

手抽位由五層共厚15mm的硬皮紙壓成，承托得起機身，唔怕聽聽吓歌壯士斷「臂」！

始終係紙皮，經常又摺又拆，會好快爛。

駁線過程也一手包辦，肯定滿足到DIY發燒友。

配一條可收入機身的3.5mm耳機線，方便駁其他播放器。

Apple Android一插即播

黑白色Hip Hop造型，外形殺晒，但別奢求具甜美和澎湃的高低靚聲！雖標榜德國製造，畢竟只有5 Watts單元，除勉強夠力震得住，若想區分高、中、低頻各類唔同樂器，肯定無能為力。好彩Boombox的「Docking」位置除兼容iPhone 4/4S/5和iPod，也支援Android，且機身連住一條3.5mm耳機線，話之你係普通MP3機，一插即播，拎去邊度聽歌都咁方便。