過去幾日應該係好日，毅行者、渣打藝趣嘉年華，就連友邦保險（1299）都揀上周五、六喺旺區搞咗五場快閃街舞，下月中仲有一場，原來係為咗贊助演唱會，家贊助唔係畀錢印個logo咁簡單，仲要諗計搞埋宣傳。
快閃街舞谷演唱會
近年全球各地興起快閃街舞，友邦今次贊助三隊南韓組合明年1月來港開一場演唱會，順理成章，將三個組合嘅hit歌串連起來玩快閃街舞，仲搵咗30位喺演藝學院畢業嘅後生仔跳，相當專業。
成個快閃街舞全長8分鐘，但上周五放工時間喺中環娛樂行門外跳嘅版本只得3分鐘，據講係擔心人多車多，跳足8分鐘會引來混亂喎。查實佢哋又使乜擔心，之前A&F一班肌肉型男搞到華人行附近亂咗成個禮拜都係咁啦。