新股年尾隆重登場，急急腳上埋招股尾班車，大家集中講隻大熱股翠華（1314），老實說除了菲菲提到的「照燈」作用外，中環日間蛇竇多的是，實在唔需要專登挨貴餐。
情況有如朋友B君戀上模，幾努力追都好，奈何模一向只接受富豪內部認購，不接受場內交易，但忽然一日模整咗個蛋糕，着住條充份展露事業線的性感短裙，出現喺B君門口邀請佢「認購」。
當茶記使出每張枱每日翻枱25次的「人類極限」，就好似模同B君講，佢讀埋個EMBA課程棄模從商咁不可思議，呢啲算唔算係「情慾陷阱」？
另一隻新股卡撒天嬌（2223）恰恰相反，未上市先預警全年盈利因上市費拖累而大減。電影《Arbitrage》中李察基爾話，要成功先要有成功的樣子，但呢隻股事先張揚自己有幾潦倒幾折墮，Samantha白表就唔會抽喇，掛牌後不妨金睛火眼實，有炒味！
Samantha
本欄逢周一、三、五刊出