巫師今年開季表現勁曳，上周六主場對爵士完場前主隊仲落後緊9分，客隊小前鋒馬雲威廉士（上）有兩個罰球炒晒，主場球迷勁開心咁慶祝；喂，個籃板球係爵士嘅米爾沙執到㗎喎，慶咩祝？原來巫師有贈品活動，只要客隊有人連續射失兩個罰球，球迷就有免費雞肉三文治食。最後球隊輸76:83，連續兩季開季8連敗。球迷輸到冇感覺，惟有食番個雞包當賺咗。