債務危機籠罩，歐洲人人自危；但4大聯賽中，英超德甲卻因而得益，皆因競爭對手西甲意甲兩大歐豬國發現，球壇勢力與國家財力絕對掛鈎。
有香港球迷慨嘆「老闆足球」掛帥，其實哪裏沒有老闆足球？英超車仔曼城、西甲馬拉加皇馬、意甲AC國米，全都不靠盈餘，只靠老闆泵水營運。結果，就是哪個老闆荷包乾水，隊波即刻「笠水」。意甲十數年前叫戰國七雄，10年前減至爭標5強，兩年前跌至三頭馬車，現在AC都笠水了，剩番國米祖記，就是因老闆逐個摺埋。
財雄勢大的德國，在歐盟基本上已「打晒骰」；一直致力財政平衡的德甲，現在歐洲系數已爬過意甲升上第3，並逐漸拋離。再看看拜仁業績，屬歐洲強隊中鮮有可連年賺錢，同時又可殺入上季歐聯決賽。之前球市泡沫膨脹，德甲拒絕參與燒錢遊戲，影響戰力；但慳家多年的堅持，終有回報。
英國最有先見之明，當年拒絕加入歐元，至今經濟受拖累不大。雖然英超歐洲系數今季被西甲反超跌至第2。但見西甲危機已若隱若現，由打歐聯的馬拉加，到打護級的拉科都拖糧。基本上除巴塞、皇馬外，第3隊開始財政都唔多掂，只靠個別球隊馬體會和華倫於歐戰打江山。接連變賣主力的畢爾包，已在歐霸跌至榜尾；若於聯賽開始走樣的馬拉加都倒下，擁多支富豪球會的英超，重返第一，只是時間問題。文:方柏翹
now足球評述員