財富中文網公佈「2012年中國最具影響力的25位商界女性」，龍湖地產（960）老闆吳亞軍、碧桂園（2007）老闆女楊惠妍、玖紙（2689）老闆張茵入榜毫無難度，最特別係往年不時高調講股，今年就大部份時間潛水唔見人嘅西京投資主席劉央，竟然首次入榜，仲要排第10位，勁！
財富中文網形容，劉央之所以夠食力上榜，皆因佢舊年買晒西京投資所有股份，家陣管理資產218億，證明女人喺投資方面可以同男人一樣咁出色。
高買低沽變明燈
劉央喺股市嘅影響力的確唔細，遠嘅唔講，講啲近嘅例子，佢兩個半月內掃咗三次貨嘅銀基（886）上星期五勁插一成，反而月初用平均1.6元狂掟嘅中國全通（633）就升唔停。繼續係咁，佢好容易變成散戶嘅另類指標。
劉央往年不時高調出席新股嘅投資者推介會，從不介意同大家分享投資心得，今年就轉趨低調，最近一批新股湧晒出來都唔多見佢蹤影，唔知人保（1339）招股見唔見到佢呢？
排名榜另一個吸引人嘅名字，係渣打（2888）大中華區主席曾璟璇，佢阿哥曾蔭權唔做特首，曾璟璇本人嘅影響力反而提高，榜內排名跳升14級至第6位，財富中文網話佢領導嘅大中華區業務佔渣打全球收入近三成，係外資行嘅異數。聽講曾璟璇仲投資有道，揸住市值過億嘅物業，認真係有財有勢。
李華華
mailto:[email protected]