睇券商報告，大部份人睇唔夠兩段就瞓着，但間中亦有些令人精神為之一振，今日不妨分享一下。德銀上周五出報告，「曲線」向新世界系新任舵手鄭家純挑機。點解係「曲線」？皆因全份報告都冇提過純官個名，但就不停畀貼士，總之係人都諗到分析員係講緊純官。
德銀劈頭就話，市場對新世界發展（017）執行能力過於樂觀。公司矢志提升賣樓效率，但在新管理層接棒後，並未如預期般改善，要晉身三大發展商的目標，似乎難度甚高，現時估值並不合理，故將評級由買入降至持有，目標價削20.7%至10.95元。
質疑管理層執行能力
以新世界9月開售的馬鞍山新盤「迎海」為例，至今僅售出665伙，佔整體72%，而同期由新鴻基地產（016）推出的屯門新盤「瓏門」，即使售價較同區其他樓盤高出約50%，銷情卻十分理想，至今已近乎售罄。
德銀多次以「新管理層」稱呼由純官領導的管理團隊，弦外之音相當明顯。不過，報告指新世界要成為本港三大發展商之一，則可能有誤，因翻查資料，純官只係話要做「四大」，野心比分析員所說的稍低。
高明覺得，分析員如此「玩針對」實有欠公允，反而該行預測未來兩年，本港樓市回落15%至20%，可能更有說服力。
高明
http://www.facebook.com/AppleKoming