昆士柏流浪（QPR）喺上周六嘅英超榜尾大戰，1:3輸咗畀修咸頓，目前喺聯賽仲未開齋。雖然領隊曉士賽後死口話唔會辭職，但佢喺「下一位離隊領隊」嘅賠率，熱到得1.17倍，好明顯莊家全線「睇好」佢。
榜尾大戰1:3負修頓
上周六，QPR以1:3輸畀俾修咸頓後，唔單止以12戰得4分，喺聯賽榜包尾，仲係今屆英格蘭4個級別聯賽之中，唯一一隊喺聯賽仲未開齋嘅球隊，你話醜唔醜！不過，領隊曉士賽後仍然好厚面皮咁話：「我唔係一個面對困難會逃避嘅人，所有困難我都會正面去解決。」
49歲嘅曉士講就口響，但班主費南迪斯賽後喺twitter度已經冇好似以往咁撐佢，佢話：「我要向球迷道歉。球迷永遠係第1位，但今次球會所有人，包括我在內，都令球迷失望，我哋有好多人都需要好好咁反省。」最令曉士冇面嘅，係完場之後，有QPR球迷舉起「哈利，嚟救我哋（Harry, Come and save us）」嘅橫額，擺明唔想要曉士，想前熱刺領隊哈利列納嚟救亡；仲有約100名球迷聚集喺球會正門，想同曉士對質㖭！
據講，費南迪斯雖然同曉士嘅關係唔錯，但球會咁嘅成績，佢點都要做嘢；難怪曉士成為下一位離隊領隊嘅賠率，熱至1.17倍，大幅度拋離次席的修咸頓領隊艾堅斯（9倍）。至於英國博彩公司珊瑚，仲開咗曉士喺星期一早上之前離隊嘅賠率，都係得1.83倍咋！