晉佳估計港股已由Go Go Go，轉為Chok Chok Chok時代，揀股會從基本因素出發，一係就買入估值低又夠穩陣嘅股份，一係買入跑贏同業又有增長嘅股份，候低吸作中線持有。
上海姑爺羅康端旗下嘅瑞安建業（983），一向少人問津，卻是其中一隻估值夠低嘅中長線持有選擇，呢隻股波幅唔大，一於博幾個月內有至少兩成回報執吓。
瑞安建業主要做內房、建築同水泥業務，今年上半年賣樓表現麻麻，水泥業務亦冇錢賺，由於債重又要畀多啲利息，結果半年虧損1.75億元。
建築業務變咗最亮眼嘅業務，今年上半年賺7100萬元，增長31%，主要幫香港政府、瑞安系內地嘅項目同澳門賭場項目等進行建築工程，穩陣之餘，未來絕對能夠受惠香港大量增加住宅供應嘅趨勢，同樣重要嘅係，羅康瑞係梁營嘛！
分段低吸睇10蚊
你睇吓喺香港做打樁，由梁振英「金主」張舜堯作大股東兼主席的嘅泰昇集團（687），嗱嗱聲將地基打樁業務嘅四成權益，出售畀副主席兼董事總經理馮潮澤，咁樣自肥法，通常係好嘢留番畀自己友，潛台詞就係，香港建築業務應該會好景。呢Part年度化分部盈利大概1.42億元，預期未來會顯著增長。
內房部份同瑞安房地產（272）有啲唔同，瑞安建業主要從事規模較細嘅商住項目，今年內有北京、廣州、瀋陽項目竣工，銷售收益會喺下半年度入賬，相信最壞時刻已經過去。另外，內地西南部嘅水泥業務，就同拉法基合作，做得唔算出色，水泥行業暫時冇乜起色，稍後唔明顯拖累業績就算。
債重亦係瑞安建業嘅絆腳石之一，6月底淨負債比率58%，半年財務費用1.17億元。不過，有缺點先至有低估值，市賬率0.4倍，唔計金融海嘯，就係1997年以來嘅最低水平，應該冇乜下跌空間，但股價仲未反映建築業務嘅上升空間，所以現價值得分段逢低吸納持有，目標價睇10蚊。
晉佳
本欄逢周一、三及五刊出