翠華（1314）招股，坊間評論多不勝數，股榮最鍾意林少陽「人類極限論」，詳情可翻閱昔日《蘋果》。 http://hk.apple.nextmedia.com/financeestate/art/20121114/18066370
翠華賣的，除了是中國夢外，最值錢是香港製造的品牌。但回顧這三年Made in HK 的新股，情況相當慘淡（見表），大部份皆選擇在最好時機、盈利增長見頂時，同大家「分享」成果。結果編織出一幅美好的前景，招股時引來全城搶購，長揸至今，巨無霸如周大福（1929）輸三分一已經叫好彩，買中現代教育(1082）潛水八成，惟有自我安慰「交吓學費」。
翠華內地突圍難度大
統計七隻2010年至今的「香港製造」新股，現價全部低於招股價，平均累積跌幅55%。七隻新股，走勢大致都是一上市就陰乾式下跌，如果抽唔到、首日上市飛入去，輸得仲甘。米蘭站（1150）去年5月招股錄得超過2000倍認購，中籤率1%，首日爆升66%，有盲毛以2.9元高追，現時跌到只有5毫子，輸八成有多。唔買米蘭站，應該可以喺佢舖頭買個靚袋。
香港製造新股，蜜月期特別短，誠如賣按摩椅的OTO豪特（6880)，一開波就冇誠意，首份業績走晒樣，純利跌32%，再發埋盈警。其他港產新股，蜜月期大致半年，首份中期或全年業績，還保持增長，但半年過後，就衰嘢全部見光，米蘭站今年中期少賺99%，全年料蝕錢，經典中的經典。
股榮
港產新股，招股時其中一個吹噓賣點是中國故事，集資額一半以上，必定是用來拓展中國市場，結果中國攻不進，香港基地卻慘淡經營，淪為雙輸局面。同樣對中國滿懷信心的翠華，撇除未來本港加租壓力不談，要在中國成功突圍談何容易。
喺香港，翠華可以視翠河、翠苑等同業為無物，但在中國擅於copy and paste的國度，要在未來三年突圍而出，不是說沒可能，只是機會渺茫。近三年港產新股100%中伏紀錄，翠華都係好食唔好抽喇。