伊巴謙莫域對英格蘭的倒掛金鈎肯定不是2012年的最佳入球，因為FIFA搞的全球選舉，在伊巴入波前的一晚已經截止了。失望？伊巴本人肯定唔會，人人爭相談論轉寄分享之際，佢話：「呢球笨唔係本人入過最靚嘅波！」
美斯攞幾多次世界足球先生都好，有樣嘢永世及唔上伊巴，就係一個悶字，相比起伊巴響球場內外嘅色香味套餐，美斯一味淨係識入波，真係悶。
本來平平無奇的國際賽日，當美斯遠道去到沙地卻食白果之際，C朗專心整靚番條眉之時，伊巴一個唔覺意搶晒鏡，搞到賽後謝拉特接過嗰件印住「100」嘅球衣時都呆若木雞；其實當日佢可能交換伊巴件10號波衫仲有紀念性，搞到謝四都要講句：「佢球倒掛係我見過最靚嘅金球……之一！」最就最啦，唔使吓吓加「之一」咁保留嘅，都係門將赫特夠可愛，佢響twitter同廣大球迷say sorry，然後話冇嘢好講，因為腦裏面只有兩個字：「伊巴！」
人人談論，雲格都加把嘴，話當年16歲嘅伊巴去過阿仙奴，不過只係參觀過訓練中心；當雲格提出想佢跟操試腳時，伊巴拒絕，結果轉個頭就去咗阿積士。雲格話伊巴唔想試腳係因為當時佢年紀細，但伊巴自己響自傳就話，佢係唔需要試腳嘅。不設試身，啱款就買，唔啱就過主！
有上一代好波之人講過，香港新一代冇超級好波之人，係因為太乖太循規蹈矩，一球波點處理永遠係得一個選擇，唔會諗吓第二個可能性。呢樣嘢響伊巴身上可以明白係咩一回事，我最記得佢嘅入波，係背對龍門雙腳離地後踭「窩利」撞射入網，得嘅咩？佢做咗你先知係得嘅。
有人將佢同一樣高大嘅卡維相比，換來佢咁嘅答覆：「佢踢5號波做到嘅嘢，我用個橙都做到！」唔係招積，係事實，被問到對法甲有幾多認識，佢坦承「法甲我唔係好熟悉，但係我好熟悉自己。」自信就是霸氣。伊巴唯一不足，係飄忽，完美嘅4球可惜來自友誼賽，嚟真嘅大賽未好過，唔緊要吖，美斯C朗都未攞過世界盃，仲有得鬥嘅，邊個話百厭仔唔可以考第1啫！
keyman
now TV主持
mailto:[email protected]