紐卡素今晚英超迎戰史雲斯，賽前「喜鵲」一眾職球員，就喺球會餐廳嘅主題日幫手宣傳一番；不過佢哋嘅宣傳手法就認真嚇人，事緣餐廳方面搞咗個「我係名人」嘅挑戰賽，仲邀請咗紐記領隊柏度同一班青年軍，大玩蜘蛛同蟒蛇等異國動物，睇吓邊個夠大膽夠出位；雖然呢次宣傳活動都幾驚心動魄，不過一班年輕人同柏度都玩得好盡興。
倫敦打吡玩復古
北倫敦打吡已經有125年歷史，周六對賽前，英國《每日郵報》安排咗一次阿仙奴同熱刺球員先禮後兵嘅聚會，就係兩軍共8名球員一齊着上125年前倫敦打吡嘅復刻衫影合照。同家件球衣相比，呢件復刻版啲質地真係又大又重，班球員都好驚訝啲前輩點樣喺場上跑得郁，據聞戴臣同路斯基兩個影嗰時仲勁流汗，快快影完即除咗件嘢。
不過，亦都有啲球員覺得好特別，好似基奧特就係咁問東問西，好似想惡補多啲北倫敦嘅歷史；至於熱刺小將積基李華摩亞，影完之後都唔肯除件衫，仲問可唔可以送畀佢做生日禮物，想話等到佢生日時同啲朋友一齊影。
AC又想搞老人院？
AC米蘭喺今季唔多掂，有傳球會副主席加里安尼為咗救亡，日前去咗西班牙一趟，據講目的係斟皇馬幾位非主力球員，卡卡、艾比奧爾同卡維奴，3位球員最後生嗰個都成27歲（艾比奧爾），唔通AC又想走返「老人院」舊路？另外據意大利《羅馬體育報》報道，中超球隊廣州恒大嘅班主、中國富豪許家印有意收購AC部份股份做股東。