上場不足四個月，被稱「吳得掂」嘅教育局長吳克儉，已經先後面對兩次「下台」同「不信任」動議，呢個紀錄，相信前無古人。吳得掂可以得罪眾生，卻不能得罪老婆，前晚佢去沙田馬場會所，同老婆慶祝生日飲紅酒，不過喜慶日子面口都唔係太寬容，因為聽日教協舉行要求中學小班大集會，面對一片下台呼聲，吳得掂酒入愁腸，愁更愁呀！
八方老友前晚報料，指局長同一名女士喺沙田馬會撐枱腳晚飯，席間兩人少說話、多食飯，目擊者話吳得掂冇乜笑容，舉起紅酒杯一飲而盡。當日下午吳得掂同中學校長講數，傾中學減派問題，不過未成功拆彈，難怪食飯時顯得心事重重。
保護愛妻免上鏡
晚飯後局長離開馬場，卻唔見女伴隨行，飲到面紅紅嘅吳得掂話自己喺會所「同朋友食飯」。佢亦冇效法陳謬波，飲咗酒冇揸車，坐座駕AM4由司機載走。八方向教育局查詢，官方講法係當晚局長同老婆梁允愛慶祝生日。
至於點解吳得掂單拖離開，原來當時吳得掂使計仔，自己上車之後，座駕兜個圈，見冇乜異樣先折返接老婆上車，免得愛妻上鏡。
其實局長夫人都係教育界人士，曾教過上葵涌官立中學，又做過育才中學副校長，咁啱兩間中學都因收生不足，早幾年被殺校，相信吳太好清楚學生減少對學校嘅影響，唔知佢哋兩位前日撐枱腳時，有冇傾番兩句？
mailto:[email protected]