澳門大賽車花絮:內地著名作家韓寒（小圖）一向鍾意賽車，今年首次征戰澳門格蘭披治嘅路車挑戰賽，揸住斯巴魯中國拉力車隊戰嘅「掃把佬」出賽，自然成為焦點。雖然第一次嚟澳門比賽，但呢條彎多路窄嘅賽道，就考唔到有豐富賽車經驗嘅韓寒，喺排位賽搶到第3位，睇吓今日正賽能否有好成績。
菀之喪意國型男
本地著名創作女歌手王菀之（左）噚日就亮相澳門賽車場，佢除咗睇排位賽外，更重要任務可能係專程搵出戰澳門GT盃嘅奪標熱門車手莫他拿；菀之去到車房搵咗一大輪先至見到呢位意大利型男，總算成功合照，相信已經成完成任務。
乃木坂撐場惹哄動
日本AKB 48女子音樂組合年初訪港，吸引到唔少粉絲捧場，而專登成立同AKB 48喺日本打對台嘅乃木坂46，竟然派出其中5位成員着住學生裝連短裙（圖），喺澳門賽車場亮相，由於事出突然，結果吸引到大批龍友起哄，場面相當熱鬧。
