政府BSD（買家印花稅）辣招一出，樓市冰封。據報有部份內地買家於香港市場搵盤，最近亦錄得零星繳付新稅的一二手樓成交。但有業界認為，內地客態度極審慎，起碼要等到過年後，樓市才會有轉機。記者：葉淑貞
「行家一時一樣，呢頭話樓市氣氛差，過兩日就話氣氛好，邊有變得咁快㗎？」在港島東打躉的地膽代理許先生不斷吐苦水，「家又話內地客重臨，其實就算有，都不過係個別例子，前幾年四叔個盤（天匯）夠話天價啦，結果咪越查越多嘢！」
許先生談到BSD就光火，「有個內地客傾緊一個盤，業主開660萬，買家還價620至630萬左右，家仲拉鋸緊，我梗係落晒嘴頭啦，但係內地客對香港樓市其實好熟，會睇香港報紙，所以不停話要睇定啲，家仲未決定。政府間唔中就打一棍，越打越大力，唔知幾時又再出招，買家邊敢入市吖？」他說這名準買家來自廣州，但堅拒透露物業名稱，以免流失已經買少見少的客仔。
「除咗內地客，連本地人都唔願買樓。有個香港人早排想買健威花園，但買唔成，近日有個差不多質素、預算的放盤，以為實做得成，點知轉頭又話要諗諗。所以呢，政府出招，第一個就係打死我（小型代理行）！」他說：「今次出招咁狠，樓價又跌唔落，消化的時間肯定比以前更長，我相信會靜到過年。」
僅少數大款唔介意
經常中港兩邊走的廣州人阿東，曾經替「阿公」在香港買樓，「家樓價咁貴，還要交十幾巴仙的稅，短期內肯定唔會再買。內地投資者都係睇利潤，無利可圖還買來做甚麼？」他在廣州持有好幾個收租物業，還有個單位專放私人珍藏，「老竇教落都係買樓穩陣，這個想法，全世界中國人都一樣，尤其銀紙是虛擬的，廣州市已經升到頂，好多人跑到南沙買。不過家限購兩套房，我想買多套南沙都冇辦法。」
阿東說，只有極富裕、金錢已經變成「符號」的人，例如山西煤礦老闆，趕住「洗錢」或移民，才不介意多交稅，「最受影響是有自住需要的雙非父母吧，焗住畀。」
專做內地客生意的梁先生認為，要白付15%稅款，多少會影響入市意欲，不過始終一切源於習慣，到大家習慣預留這一筆，有置業需要的用家也會接受交稅。他相信新稅可大幅減少購入後丟空的可能，「丟空的都是投資者，他們精打細算，要白白多交15%現金就未必肯，而且擔心政府會拿他們的空置單位開刀，所以短期內必會有所收斂。」