今屆立法會法律界功能組別選舉，由公民黨郭榮鏗大戰王桂壎（圖），好彩泛民保得住呢個橋頭堡。民主之父兼資深大律師李柱銘選前都話，郭榮鏗遇到建制派史上最強對手，因為唔少人都覺得王桂壎夠中立；但王桂壎嘅選舉開支就顯示，聲稱中立嘅佢，原來以兩萬蚊服務費，聘用前民建聯副主席程介南做選舉策略顧問。早前已有傳程介南以朋友身份幫王桂壎，原來呢位「朋友」有價。
王桂壎經常強調自己並非泛民派、亦非建制派，希望透過呢個中立賣點，搶走議席。王嘅軍師程介南經常協助建制派硬撼泛民，07年就幫過葉劉淑儀復出，硬撼陳方安生。
郭榮鏗四萬請公關
王桂壎除咗搵程介南做軍師搞好形象，仲好悉心咁搞好外表。選舉開支顯示，佢喺著名英國品牌Tie Rack買咗四條靚呔選舉時用。佢對手郭榮鏗都唔弱，用咗四萬蚊聘請啱啱喺鞍泰選區區議會落敗嘅民主黨游月華做公關，足足係程介南顧問費嘅一倍。公民黨亦聘請前AO、幫過梁家傑選特首嘅黃明樂做軍師，訓練所有公民黨候選人點樣應付選舉論壇，花費一萬蚊。