吊頸都要唞吓氣，好打得嘅政務司司長林鄭月娥，湊住兩個不成器局長「吳得掂」同陳謬波，唔吐血都身心俱疲喇。難得有機會去歐洲外訪六日，林鄭應該樂得行開吓。
與其對住兩個裙腳仔，「奶媽」林鄭不如趁去英國見吓真正嘅屋企人好過，可惜快樂嘅時光過得特別快，話咁快前日佢已經由倫敦轉到去西班牙馬德里。林鄭歐遊還歐遊，都唔係冇做嘢嘅，有圖有真相！噚日新聞處就發出林鄭同西班牙政府司法部副部長費蘭度．羅曼嘅合照，原來佢哋簽署咗刑事事宜相互法律協助同埋移交被判刑人士協定，呢單嘢太深奧，暫時無謂深究。
睇相見到林鄭容光煥發，就知道佢喺歐洲有好日子過，不過有得嘆好嘆喇，遲啲去埋巴塞隆納之後，18號又要番香港對住呢個爛政府。