上星期內會、財會先後發生議員投票同結果不一嘅問題，本來秘書處整番好個掣、裝番個「黑盒」咪乜事都冇囉。但民建聯噚日唔知黐咗邊個總掣，突然老屈公民黨陳家洛唔知飲咗酒定食藥，自己暈陀陀至㩒錯掣，好彩家洛急發澄清，唔似狼振英咁拖得就拖。
急發聲明表清白
話說噚日內會上，民建聯陳恒鑌意有所指咁話投票係一個判斷，食藥、飲酒都可能有影響。跟住「元秋」蔣麗芸仲言之鑿鑿咁話，上星期開財會嗰晚，有人聞到家洛身上好大陣酒味。
期間民建聯黃定光和應，話佢都聽到有人話當晚聞到家洛有酒味。
呢啲名副其實係三人成虎，家洛即時義正詞嚴否認，「兩個沒有，沒有飲任何有酒精類嘅飲品，除咗清水，也沒有食過任何嘅藥物，報告完畢。請回歸正常的會議程序，尊重自己及這個議會嘅傳統」，之後發出聲明，民建聯即刻拜拜。