亞視強迫員工參與直播爛騷，搞到天怒人怨，王征仲帶頭跳《江南Style》，冇俾人掟雞蛋真係要去還神。咁騎呢嘅電視台，居然夠膽話同無綫收視「四六開」，真係笑死人。實不相瞞，當年佢何止「四六開」，直頭打到無綫有氣冇碇唞，不過已經係32年前嘅事。
1980年亞視仲係叫麗的，搵咗蕭若元親手策劃，由劉志榮、鮑起靜等主演嘅民初劇《大地恩情》，嚟撼無綫同時段嘅《輪流傳》。《輪流傳》卡士都好勁，有李司棋同鄭裕玲助陣，但都唔夠揪，播咗15集就被迫腰斬，搵汪明荃同謝賢主演嘅《千王之王》頂上，先收復失地，臨危受命嘅《千王之王》係王天林、王晶兩父子監製。哈，公仔箱真係成也王晶，敗也王征。
問番蕭若元點睇，佢前日好欷歔咁喺電話度話：「亞視呢幾年換老闆換得太密，員工都無所適從，敗不足以為辱，但佢哋連打都冇打過。亞視曾風光過幾段時間，《大地恩情》時真係打到無綫死咗，不過近年零收視，我成日問盛品儒使咗11億到底做過啲乜？不戰、不和、不守，係咁真係冇得做。」
撰文：阿Wow
