隨着狼振英上場，煲呔嘅御用智囊智經研究中心亦風光不再。繼智經前任主席胡定旭早前靜雞雞冇做主席，智經噚日亦低調發表對施政報告同預算案嘅建議書。以往佢哋發表預算案建議，都會大鑼大鼓召開記者會，有問有答。今時今日，俱往矣。
為咗唔好俾人感覺太hea，智經今次喺房屋問題着墨，建議推出「半租半買」計劃，目標係幫申請唔到公屋嘅首次置業人士，建議係申請人先買五成業權，另外五成業權由政府嘅指定機構持有，申請人以較優惠租金租用餘下五成業權，將來有錢時可購回業權。建議有煲呔提出可租可買嘅置安心影子，但置安心喺狼振英上場後，變咗只賣不租。呢份建議書，稍後應該會喺堆填區搵到。